Жамоат транспорти сифати аҳоли кайфиятига таъсир кўрсатувчи восита ҳисобланади. Шу боисдан ҳам сўнгги йилларда пойтахт ва ҳудудларда жамоат транспорти хизмати сифатини яхшилашга катта эътибор қаратилмоқда. Хусусан, Хитой давлатидан замонавий автобус ва электробуслар харид қилиниб, пойтахт ва ҳудудларда қатновга қўйилгани аҳоли учун катта қулайлик яратмоқда. Натижада аҳолининг жамоат транспортига бўлган ишончи ортмоқда. Одамлар шахсий автомобилдан кўра, жамоат транспортидан фойдаланишни афзал кўрмоқда.
Тўғри-да, ёзда салқин, қишда иссиқ автобусда манзилга тез етиб олиш кимга ёқмайди. Аввалгидек, бекатларда кутишлар йўқ, тўловлар онлайн тизимга ўтказилди. Жамоат транспортида нақд пулга эҳтиёж йўқ. Хуллас, ёшу кекса жамоат транспорти хизматидаги бу ўзгаришлардан мамнун.
