Hududlarni obod qilish, qishloq va mahallalarda infratuzilma bilan bog‘liq eng dolzarb masalalarni tizimli hal etish, xususan, joylarda ichki yo‘llar, ichimlik suvi, elektr energiyasi va gaz ta’minotini, ta’lim, sog‘liqni saqlash, madaniyat, sport hamda boshqa infratuzilma ob’ektlarini yaxshilash asosida aholi uchun munosib turmush sharoitlarini yaratish mamlakatimiz miqyosida bosh shiorga aylandi desak o‘rinli bo‘ladi. Zero odamlar rozi bo‘lishi uchun avvalo turmush sharoitlari risoladagidek bo‘lishi lozim. Bu borada chekka-chekka qishloqlarda ahvol qanday? Bu savolga javob topish va holatga bevosita guvoh bo‘lish maqsadida Pop tumaniga yo‘l oldik.
Soat 11 dan keyin tuman hokimligiga yetib bordik. Ozod mahallasi hokim yordamchisi Mavluda To‘raeva hamrohligida ish qizg‘in ketayotgan Nurobod mahallasi tomon yo‘l oldik. Birinchi duch kelganimiz – kommunal xizmatlar va yo‘l qurilishiga qarashli xuddi poezd kabi qatorasiga terilgan yuk tashuvchi transportlar e’tiborimizni tortdi. Bu yerda viloyat va tuman hokimligi mutasaddilari, sektor rahbarlari, mahalla beshligi hammasi jamuljam. Nariroqda ishchi-xodimlar gaz tarmog‘i quvurlarini bo‘yashmoqda. Xolislik nuqtai nazaridan alohida ta’kidlashimiz joizki, “Nurobod” MFYga qanday kelib qolganimiz haqidagi tafsilotlarni yuqorida bayon qildik. Ya’ni, avvaldan borar manzil kimdir tomonidan belgilanib, tavsiya qilingani yo‘q. Xullas, Nurobodga kelib qolganimiz muayyan ma’noda ayni tasodifdir. Chunki shu kuni mazkur mahallada keng ko‘lamli ishlarning boshlanayotganiga qaramay, bu yerda bironta ommaviy axborot vositasitasi vakillarini uchratmadik, na televidenieni va na boshqasini. Bilsak, asosiy maqsad ham ommaga ovoza qilmay, amaliy ishlarni vijdonan bajarish bo‘lgan ekan. To‘raqo‘rg‘on, Uychi, Norin va Pop tumanlaridagi “Obod qishloq” va “Obod xonadon” dasturlari hayotga tatbiq etilib, og‘ir hududlar tanlab olinibdi. Xo‘sh, aslida obod qishloq va obod xonadon qanday bo‘lishi kerak? Faqatgina yo‘li ravon va ichimlik suvi bor, gazi yonib, chirog‘i o‘chmaydigan ko‘cha va uymi? Savolga “ha” deb javob bersak, u holda bevosita sog‘liqni saqlash bilan bog‘liq masalalar – sog‘lom turmush tarziga rioya qilish, to‘g‘ri ovqatlanish va turmush-ro‘zg‘orda rioya qilinishi shart bo‘lgan boshqa gigienik madaniyatlar ortiqcha dahmazami? Ba’zi o‘rinlarda ko‘ramizki, maishiy
dabdabalarga keragidan ortiq mablag‘ sarflab, oddiy gigienik qoidalarga bepisandmiz. Poygaklarga allaqanday gulbetonlar “to‘shalgani” holda hammom va hojatxonalarga e’tibor qaratilmaydi. Yoki kaftdekkina bo‘lsa-da yerini qarovsiz qoldirib, beparvo bo‘layotganlar ham yo‘q emas. Oshko‘k, ukrop yoki boshqa darmondorilarga boy va foydali o‘simliklarni parvarishlab, yangi uzilganini ovqatga qo‘shib iste’mol qilishga nima yetsin. Buning uchun u qadar katta yer maydoni ham, mablag‘ ham talab qilinmaydi. Bu borada hovlisidagi ekin maydoni kichik sharoiti yo‘qlar hatto, yog‘ochdan yasalgan to‘rtburchak tuvaklarda ko‘katlarni yetishtiradi. Tomorqalar esa ro‘zg‘ordagi daromadning koni ekaniyam sir emas. Ana shunday sarishtaligu osoyishtalik fazilatlari har bir xonadonga kirib borib, ustuvorlik ahamiyat kasb etishi zarur! Xalqimiz bejizga “Harakatda barakat” demagan. Bularning hammasi targ‘ibot-tashviqot ishlariga va mahallalardagi beshlikning tashabbuskorligiga hamda masalaga nechog‘liq mas’uliyat bilan yondashilayotganiga bog‘liqdir. O‘zaro hamjihatu hamfikrlikda va “Mahallam – faxrim, xonadonim namunali” g‘oyasi ostida xayrli ishlarga mahkam bel bog‘lansa, albatta, yurt obod va ko‘ngillar shod bo‘ladi.
