Ўзбекистон давлат жаҳон тиллари университети талабаси.
Ватан – азалдан энг муқаддас макон саналган. Сувидан то гиёҳи қадар бегона кўзлардан ҳимоя қилинган. Демак, бу юрт учун ҳар бир фарзанд жон куйдурмоғи, унинг келажаги учун оз бўлса-да ўз ҳиссасини қўшмоғи лозим. Инсон ҳамиша самимий инсон билан дўст бўлишга интилганидек, имони бут фарзанд бўлиш учун ҳам Ватанга она каби интилади, уни асраб-авайлашга уринади. Она Ватан қадрини бир сония бўлса ҳам мусофир бўлган инсонгина янада теранроқ тушунса ажаб эмас. Дарҳақиқат, бу маскан қудратию ва гўзаллигининг шоҳиди бўлиб яшаётган биз ёшлар учун ҳам Ватан – ягона ва муқаддасдир. Бизнинг вазифамиз эса – она юртимизни асраш, ривожлантириш ва улуғлашдан иборат. Зеро, биздан кейинги авлод ҳам бу юртнинг мустақиллиги ва тинчлигини сақлашга тайёр бўлиб улғаймоғи шарт. Бунинг учун эса биздан талаб қилинадигани – юксак билим эгаллаб, танлаган соҳамизнинг малакали мутахассиси бўлиб етишиш, деб ўйлайман.
Мен 2003 йилда Сирдарё вилоятининг Ховос туманида туғилганман. Ҳозирги кунда Ўзбекистон давлат жаҳон тиллари университетининг Халқаро журналистика факультети 4-босқич талабасиман. 20 ёш – инсон умрининг энг навқирон, ғайрату шижоатга тўла даври ҳисобланади. Шу боис, мен ҳам ўқиш билан бир қаторда ўз устимда ишлаб, билим ва маҳоратимни, танлаган соҳамни янада пухта эгаллаш мақсадида жамиятнинг фаол фуқароси бўлишга ҳаракат қиляпман. Бу йўлда озми-кўпми, ўз олдимга қўйган мақсадларимга эришиб келяпман.
Хусусан, 2019 йил Республика ёш ижодкорлар кенгаши ташаббуси билан ташкил этилган “Ўзбекистон баҳори” кўрик-танловининг республика босқичида наср йўналишида фахрли 3-ўринни қўлга киритдим. 2020 йил “3-ренессанс Ёшлар нигоҳида” Республика кўрик-танловининг университет босқичида ғолиб бўлиб, республика босқичида ҳам муносиб иштирок этдим. 2021 йилда “Йил талабаси” кўрик-таналовининг университет босқичида “Энг яхши блогер” номинациясида 1-ўринга сазовор бўлдим ва республикада кучли 10 таликка кирдим. Шунингдек, ўша йили “Ўзбекистон ёшлари бузғунчи ғояларга қарши” мавзусида ўтказилган видеороликлар танловида ҳам иштирок этиб, университет ва республика миқёсида 1-ўринни қўлга киритдим.
Янги – 2024 йил ҳам мен учун омадли бошланди, десам адашмаган бўламан. Чунки инглиз тилини билиш бўйича B2 даражасини қўлга киритдим ҳамда Ректор стипендияси совриндори бўлдим.
Агар эришган ютуқларим, амалга ошираётган ишларим туфайли оз бўлсада жонажон юртимиз равнақига ўз ҳиссамни қўша олган бўлсам, бундан мамнунман.
Зеро, қанча гапирсак ҳам, Ватан таърифини айтмоққа калом-у, ёзмоққа қалам ожиз. Ҳар бир инсоннинг соғинган юрак тафтига меҳр уруғини қадагувчи буюк юртида ҳамиша эзгулик ва тинчлик бардавом бўлаверсин! Жонажон Ўзбекистонимиз ҳам дунёнинг энг гўзал ва энг буюк давлатига айланаверсин!
