Элёрбек Раҳматиллаев
сўнгги йилларда ҳуқуқ
соҳасида академик ютуқлари,
халқаро тажрибаси ва
инновацион ташаббуслари
билан эътибор қозонаётган
ёш мутахассислардан бири
ҳисобланади.
Диёра ТОШПЎЛАТОВА,
журналист
У Тошкент давлат юридик университетида таҳсил олаётган даврида Street Law лойиҳасида фаол иштирок этиб, мактаб ўқувчиларининг ҳуқуқий саводхонлигини оширишга қаратилган тарғибот ишларини олиб борди. Шу билан бирга, Ёш олимлар кенгаши аъзоси сифатида илмий фаолият билан шуғулланди. Бакалавр босқичини якунлар экан, у нуфузли Stipendium Hungaricum грантини қўлга киритиб, Венгрияда магистратура босқичида таҳсил олди. Кейинчалик АҚШнинг “Penn State” университетида LL.М. дастурини давом эттирди. Унинг “Minority Shareholder Protection in Uzbekistan and the United States: Lessons from U.S. Case Law for Emerging Markets” мавзусидаги илмий тадқиқоти алоҳида эътироф этилиб, Scientific Academy томонидан “Эл-юрт фахри” халқаро эсдалик нишони билан тақдирланди. Магистратура босқичидан сўнг, у фаолиятини корпоратив ҳуқуқ ва низоларни муқобил ҳал этиш йўналишига қаратди. 2026 йил 24 февралда Тошкент медиация маркази томонидан ўтказилган танловдан муваффақиятли ўтиб, медиаторлик сертификатини қўлга киритди. Э. Раҳматиллаев, шунингдек, lex-el.com легал технология платформасига асос солган. Мазкур лойиҳа корпоратив ҳуқуқий муносабатларда аниқ ва тизимли юридик ёрдам кўрсатишга мўлжалланган бўлиб, сунъий интеллект асосидаги чатбот орқали фойдаланувчиларга мослаштирилган маслаҳатлар тақдим этади. Лойиҳа АҚШ омпанияси билан инвестицион ҳамкорлик асосида ривожлантирилмоқда. Ҳозирда уни кенгайтириш ҳамда амалий тизимларга интеграция қилиш устида иш олиб бориляпти. Хусусан, АҚШнинг Калифорния штатида жойлашган Boss Security Screens SFV LLC компанияси билан инвестиция шартномаси тузилган бўлиб, ҳамкорликнинг асосий мақсади – LEX-EL.com платформасини мазкур компаниянинг кундалик операцион тизимига интеграция қилишдан иборат. Ушбу компания АҚШда хавфсизлик технологиялари, жумладан, кузатув камераларини ишлаб чиқаришга ихтисослашган ҳамда мижозлар билан ишлаш жараёнларини оптималлаштириш мақсадида сунъий интеллект асосида автоматлаштирилган чатбот тизимларини жорий этишни режалаштирган. Платформа АҚШ ҳуқуқи, хусусан, суд амалиёти (case law) асосида шакллантирилган билимлар базасига таянган ҳолда ишлайди. Бу эса, айниқса, бизнес субъектлари учун ишончли ва амалий воситага айлантиради. Бундан ташқари, тизим компанияларнинг ички ҳуқуқий рискларини аниқлаш, мижозлар билан тузиладиган шартномаларни дастлабки таҳлил қилиш ва муаммоли вазиятларда тезкор юридик йўналиш бериш имкониятига эга. Шу жиҳатдан, LEX-EL.com нафақат маслаҳат берувчи восита, балки корпоратив бошқарув ва cомплианcе жараёнларини қўллаб-қувватловчи инновацион ечим сифатида баҳоланмоқда. Мазкур лойиҳа Элёрбек Раҳматиллаевнинг ҳуқуқ ва технологияни интеграция қилиш борасидаги амалий ёндашувини яққол намоён этади ҳамда унинг корпоратив ҳуқуқ соҳасидаги экспертлигини реал бизнес муҳитида қўллай олиш салоҳиятини тасдиқлайди.
