Хоразм томонга йўлга чиққан пойтахтлик ёки хорижлик меҳмонлар минг километрлар йўл босгач, бу қадим заминга қадам қўяди. Йўл узоқ. Йўловчилар Бухорои шарифдан ўтгандан кейин чексиз қумликларга дуч келади. Гўё уларнинг назарида бу қумликларнинг адоғи йўқдек. Хоразм дегани фақат қумликлардан иборат эканда, деб ўйлашингиз ҳам табиий. 6-7 соатлар қум кечиб яшилликка бурканган замин – Хоразмга кириб келасиз. Тупроққалъа, Ҳазорасп, Боғот, Хонқа – бу туманлардан ўтиб, ниҳоят Урганч шаҳридасиз
Бугунги кунда ҳатто дунё сайёҳларини ҳам лол қолдираётган, кундан кун гўзаллашиб бораётган қадим воҳанинг шаҳару қишлоқларини кўриб бир ҳайратингизга ўн ҳайрат қўшилиши табиий. Ҳақиқатан ҳам, кейинги 56 йилда Хоразм вилояти ҳудудлари қиёфаси тубдан ўзгарди. Ҳам- ма жойда кенг кўламда олиб борилаётган бунёдкорликлар, “Янги Ўзбекистон” массивларининг барпо этилиши, уларда қад ростлаётган кўп қаватли осмонўпар бинолар кўрганнинг кўзини қувонтиради. Бир сўз билан айтганда, воҳадаги бу ўзгаришлардан, бунёдкорлик ишларидан элдошларимиз ҳам хурсанд. Ўзбекистон Республикаси Мустақиллигининг 33 йиллигини муносиб қаршилаётган хоразмлик қурувчилар ҳозирданоқ тайёр бўлган турар жой ва бошқа объектларни фойдаланишга топширишга киришишди. Бу эса улардан байрамга муносиб совға бўлмоқда. Қолган объектларда эса ишлар жадал давом эттирилмоқда.
