Ҳар бир инсон эркинликни ёқтиради. Чунки ҳурлик инсониятнинг фитратида бор. Шунинг учун ҳам ўтмишда озодлик учун қанча урушлар бўлган, қанча қонлар тўкилган. Шундай экан, мустақиллик – биз учун энг улуғ неъматлардан биридир. Ватанимиз мустақилликка эришганига 32 йил бўлди. Бу вақт мобайнида мамлакатимизда кўплаб янги бино ва иншоотлар қад ростлаб, кенг кўламдаги қурилиш ишлари амалга оширилди. Орамизда бугун қўшалоқ байрамни нишонлаётганлар, яъни юртимиз мустақиллигининг тенгдошлари ҳам бор
Комилжон Базарбаев 1991 йилда Қорақалпоғистон Республикасининг Беруний тумани, Навоий номидаги овул фуқаролар йиғинида туғилган. Унинг болалиги мана шу овулда ўтди. Ўрта мактабни тугатгач, тумандаги касб-ҳунар коллежида ўқишни давом эттиради. Гарчи бу даргоҳда ЭҲМ йўналишида таҳсил олган бўлса-да, лекин ўша пайтларданоқ ҳар хил қурилмалар, техникалар ва биноларнинг конструкцияларига қизиқа бошлайди. Ўшанда уларни ўрганишни ўз олдига мақсад қилади.
– Коллежда ўқиб юрган кезларимда бино ва иншоотларнинг ажойиб макетлари бўларди, – деди Комилжон ака. – Бу соҳага қизиққаним учун конструкцияларни ўргана бошладим. Бу орада геодизия бўйича 3 ойлик курсда ҳам ўқидим. Коллежни тугатганимдан кейин 2010 йилда Россия Федерациясига ишлаш учун кетдим. У ерда кўплаб объектлар қурилишида қатнашдим. Энг йирик ва узоқ муддатда қурган лойиҳамиз – бу “Москва-cити” бўлди. Бу қурилишда геодезист сифатида фаолият олиб бордим. Бундан ташқари, яна кўплаб бино ва иншоотлар қурилишида қатнашдим. Айтиш мумкинки, соҳадаги билим ва кўникмаларимнинг кўпи амалиёт жараёнида пайдо бўлган. Шунингдек, соҳага оид китоблар ўқишни ҳам канда қилмайман. Интернет орқали ҳам қурилишга оид янгиликлардан бохабар бўлиш-
га ҳаракат қиламан. Филипп Никандров ва Заҳа Ҳадид каби халқаро тоифадаги профессионал архитекторларнинг лойиҳаларини мунтазам кузатиб бораман.
2018 йилда Ўзбекистонга қайтган Комилжон Базарбаев “Новастрой” компаниясида муҳандис-геодезист бўлиб иш бошлайди. Мазкур компаниядаги фаолияти давомида йирик савдо ва бизнес марказлари, турар жой бинолари қурилишида бевосита иштирок этиб, сидқидилдан меҳнат қилиб келмоқда. Мустақиллик тенгдоши бўлган қаҳрамо-
нимиз мусофирчиликда ҳис қилган Ватан ва ота-она соғинчи ҳақидаги фикрларини биз билан ўртоқлашди.
