Айтиш мумкинки, Янги Тошкент лойиҳаси бугунги куннинг энг долзарб ва катта аҳамиятга эга лойиҳаси сифатида жамоатчиликда катта қизиқиш уйғотмоқда. Лойиҳа қачон якунланади? Унда нималар бўлади? Ҳозирда қурилиш жараёни қандай кетяпти? Бу саволлар ҳар бир юртдошимизни бирдек қизиқтираётгани бор гап.
Дарҳақиқат, Ўзбекистон Республикаси Президенти Шавкат Мирзиёев бошчилигида 2023 йил 18 март куни Янги Тошкент шаҳри қурилишига тамал тоши қўйилган эди. Ўзбекистон Республикаси Президентининг 2023 йил 20 июлдаги ПҚ-232-сон қарорига асосан, Янги Тошкент шаҳрини барпо этиш мақсадида Тошкент вилоятининг Юқори Чирчиқ ва Ўрта Чирчиқ туманларидан 19 720,9 гектар ер майдони танлаб олинди
ҳамда дастлабки босқичда 2 420 гектар ер майдонида қурилиш ва ободонлаштириш ишлари амалга оширилиши режалаштирилди.
