Юртимизда сўнгги йилларда янги бино ва иншоотлар қурилиши кўпаймоқда. Шунингдек, бу соҳада фаолият юритувчи ташкилотлар сони ҳам ўтган йилларга нисбатан анчайин ортган. Хусусан, Статистика агентлиги берган маълумотларга кўра, 2023 йилнинг январь-август ойларида қурилиш соҳасида янги ташкил этилган тадбиркорлик субъектлари сони 3 421 та бўлиб, бу кўрсаткич 2022 йилнинг мос даври билан солиштирганда 220 тага кўп.
2023 йилнинг январь-август ойларида Ўзбекистонда 93 трлн 268,8 млрд сўмлик қурилиш ишлари бажарилиб, бу кўрсаткич 2022 йилнинг мос даврига нисбатан 105,9 фоизни ташкил этди. Бу ишларнинг 90 трлн 525,8 млрд сўмлик ҳажми нодавлат мулкчилигидаги ташкилотлар томонидан бажарилган. Жумладан, бунга амалга оширилган қурилиш ишлари, янги қурилиш, капитал ва жорий таъмирлаш ҳажмлари киради.
Мазкур қурилиш ишларининг иқтисодий фаолият турлари бўйича тақсимланиши қуйидагича:
– бинолар ва иншоотлар қуриш йўналиши – 68,4 фоиз;
– фуқаролик объектларини қуриш йўналиши – 21,5 фоиз;
– ихтисослаштирилган қурилиш ишлари йўналиши – 10,1 фоиз.
Шунингдек, сўнгги йилларда пойтахтимизда янги бино ва иншоотлар барпо қилиш учун ҳаракатлар анча ошган. Жорий йилнинг январь-август ойлари Тошкент шаҳрида жами 22,6 трлн сўмлик қурилиш ишлари амалга оширилди. Шу жумладан, ушбу ҳудудда йирик қурилиш ташкилотлари томонидан бажарилган қурилиш ишлари улуши 25,3 фоизни, кичик корхона ва микрофирмаларнинг улуши 66,1 фоиз ҳамда норасмий секторда бажарилган ишлар эса 8,6 фоизни ташкил қилди.
Маълумот учун, 2023 йилнинг 1 сентябрь ҳолатига кўра, Ўзбекистон Республикасида қурилиш фаолияти билан шуғулланаётган корхона ва ташкилотларнинг умумий сони 34 368 тага етди.
