Андижонлик тадбиркор Улуғбек Маматқулов ўқувчилик пайтлариданоқ келажакда қурувчилик касбини эгаллашни астойдил ният қилган эди. Аъло баҳоларга ўқийдиган Улуғбекнинг бу қарори кўпчилик синфдошларини ҳам ҳайрон қолдирганди, ўшанда. Шу зайл барча битирувчиларнинг аксарияти турли олий ўқув юртларида ўқишга интилган дам у Андижон шаҳридаги қурилиш ташкилотларидан бирига бетончи бўлиб ишга кирганида унинг қарори қатъий экани янада аён бўлди.
Қурилиш соҳаси осон йўл эмаслигини дастлабки кунданоқ қалбан ҳис этди. Вақт ўтгани сайин меҳнатда тобланиб, бетончиликдан бошқа ишларга ҳам ҳаваси ортиб, барчасини ўзлаштиришга интилаверди. Айниқса, лойиҳалаш сирини жиддий ўрганишга киришди.
Ана шундай кезлари қайси соҳа бўлишидан қатъи назар уни батафсил ўрганиш ва ўзлаштириш учун албатта, тажрибали устозларга таяниш кераклигини англаб етди. Бир куни тушлик пайти тутнинг соясида дам олиб турганида уйқу элитибди. Орадан қанча вақт ўтганини билмайди, кимдир чақирганини эшитиб, ҳушёр тортди. Қараса, тепасида соҳада узоқ йиллар меҳнат қилаётган уста Раҳмонберди ака турибди. Бироз хижолат тортган
эди:
– Қурилиш ишлари оғир, унинг нони қаттиқ бўлади, аммо тотли, шу боис ҳамма ҳам бу касбда узоқ вақт ишлолмаганининг сабаби шундан. Анча вақтдан буён кузатиб юраман, бажараётган ишларинг пухта, мана шундай шашт билан меҳнатга ёндашсанг, келажакда сендан яхши қурувчи чиқади, – деб далда бергани уни руҳлантириб юборади.
У шу кундан бошлаб соҳада қандай муаммога дуч келса, Раҳмонберди акага учраб, билмаганларини сўраб олишдан орланмади. Ўрганганларини эса бирини ёдда сақлаб қолса, бошқасини эринмасдан ён дафтарчасига ёзиб борди. Кейинроқ бошқа бир объектни тиклашда участка раҳбари уни устозига бириктириб қўйди. Биргаликда фаолият кўрсатган тўрт йиллик фаолияти танлаган касбини мукаммал ўзлаштириши ва давлатимиз томонидан ишбилармонларга яратилаётган шароитлар туфайли бунёдкорлик соҳасида тадбиркорлик қилишига имкон берди. Қурилиш корхонаси ташкил қилиш истаги борлигини устозига айтганида, у киши биринчилардан бўлиб қўллаб-қувватлади.
Шу тариқа “Анемон элит” МЧЖ корхонасини ташкил қилиб, тажрибали қурувчилар қаторида чаққон, ҳар ишни сифатли бажаришида қаноти остида турадиган ёшларни жалб қилди. Корхона жамоасининг дастлабки бунёдкорлик ишлари Хўжаобод туманида 1 та беш қаватли ва 1 та 7 қаватли турар жойни сифатли бунёд этганида яққол кўзга ташланди. Вилоят қурилиш бош бошқармасида мазкур корхонанинг ҳам номи қайд этиладиган ва тендерларда иштирок этиш учун таклиф қилинадиган бўлди. Натижада шу туманда яна битта 5 қаватли уй-жойнинг қурилиши ҳам уларга ишониб топширилди.
Қурилиш соҳасида сифат масаласи биринчи ўринда туриши ҳеч кимга сир эмас. Шу боисдан жамоа аъзолари бунга масъулият билан қараётгани ишларнинг жадал юришида асосий омил бўлди. Масалан, Булоқбоши туманида уларнинг меҳнати билан қурилган мактабгача таълим ташкилоти, “Обод қишлоқ” ва “Обод маҳалла” давлат дастурлари доирасида бунёд этилган намунавий уй-жойлар шунинг самарасидир. Айни пайтда ана шу ерларда истиқомат қилаётган аҳоли қурувчилар бажарган ишларнинг сифатидан миннатдор.
Маълумки, кўп йиллар давомида республикамизнинг бошқа жойларидаги сингари Андижон вилоятида ҳам уй-жойга бўлган эҳтиёж анча катта эди. Айниқса, Андижон шаҳрида ушбу масала долзарблигича қолаётган эди. Давлатимиз раҳбарининг вилоятга ташрифидан бирида мазкур масалага алоҳида эътибор қаратиб, “Янги Андижон” шаҳрини бунёд этиш бўйича ташаббусни илгари сурди.
“Анемон элит” МЧЖ жамоаси ҳам “Янги Андижон” қурилиши жараёнида фаол қатнашиб, турдош корхоналардан ортда қолмасликка ҳаракат қилмоқда. Шу кунларда мазкур объектда жамоа томонидан 2 та етти қаватли уй-жойлар бунёд этиляпти.
