Ижтимоий тармоқларда Тошкент вилоятининг Чирчиқ шаҳридаги “Ифтихор” МФЙ ҳудудида бунёд этилаётган “Янги Ўзбекистон” массивида қад ростлаган 11 ва 12-сонли уйларда юзага келган ҳолатни ўрганиш ва ечим топиш мақсадида ишчи гуруҳи ташкил этилди.
Республика Қурилиш ва уй-жой коммунал хўжалиги соҳасида назорат қилиш инспекцияси раҳбари Козим Тўлаганов бошчилигидаги ишчи гуруҳ Қурилиш ва уй-жой коммунал хўжалиги вазирлиги ва унинг ҳузуридаги лойиҳа институтлари, “Qishloqqurilishloyiha”, шунингдек, “OʻzGASHKLITI” лойиҳа-қидирув ташкилотлари масъуллари, Тошкент вилояти ва Чирчиқ шаҳри ҳокимлиги мутасаддилари, сектор раҳбарлари, қурилиш-пудрат ташкилоти вакилларидан иборат. Чирчиқ шаҳридаги “Янги Ўзбекистон” массивида пудратчи “Янги замон бино” МЧЖ томонидан қуриб фойдаланишга топширилган ҳажмий темир-бетон панель конструкцияли турар жой
биноларининг бугунги кундаги техник ҳолати ишчи гуруҳ томонидан ўрганилганда бир қатор камчиликлар аниқланди. Геологик изланишлар хулосасига кўра, ушбу бинода “Чўкувчан ва ўта чўкувчан грунтли ҳудудларда қуриладиган бино ва иншоотлар тўғрисида”ги шаҳарсозлик норма ва қоидаларининг 9-банди талабларига мувофиқ қурилиш ишлари бажарилган. Бироқ 2022 йил баҳор-куз мавсумидаги ёғингарчиликлар туфайли кўп миқдордаги ёмғир сувлари ирригация тизимларисиз мунтазам равишда бино пойдеворига сизиб кирган ва бино атрофига йиғилиб қолган.
Натижада бино остининг асос қисми сувга тўйиниб, унинг вертикал сейсмик чоклари лойиҳавий ҳолатидан кўчган. Маълум бўлишича, мазкур ҳолатни бартараф этиш бўйича “Qishloqqurilishloyiha” институти томонидан 2023 йил 14 февралда “Янги
замон бино” МЧЖ бош директорига бино остига сув кетишини олдини
олиш бўйича ёзма кўрсатма берилган ва геодезия ҳамда муҳандислик изланишлари олиб борилган. Уйлар пойдевори асосининг чўкиши ва унинг намланишини олдини олиш бўйича чора-тадбирлар лойиҳаси ишлаб чиқилган ва бажариш учун топширилган бўлсада, пудратчи томонидан ҳеч қандай чора кўрилмаган. Мазкур уйлар динамикасининг салбий томонга ўзгаргани сабабли қурувчи ташкилот юзага келган масалаларни бартараф қилиш бўйича лойиҳа ечимлари ва чора-тадбирлар режасини ишлаб чиқишни сўраб “Qishloqqurilishloyiha” МЧЖга мурожаат қилган. Институт томонидан тегишли лойиҳавий ечимлар ишлаб чиқилган.
